Монгол орны зүүн бүс нутаг нь цагаан зээрийн үндсэн бэлчээр нутаг юм. Дэлхийн байгаль хамгаалах сан (WWF)-гийн Монгол дахь хөтөлбөрийн газар 2018 оноос хойш экоклубын сурагчидтай хамтран цагаан зээрийг хамгаалах аяныг хэрэгжүүлж ирсэн. Энэхүү санаачилга нь бэлчээрийн доройтол, хээрийн түймэр, хууль бус агнуур зэрэг  цагаан зээрийн амьдрах орчинд учирч буй аюул заналын талаар олон нийт болон шийдвэр гаргагчдын анхаарлыг хандуулах, ойлголтыг нэмэгдүүлэх зорилготой юм.   

Аяны хүрээнд сурагчдаас дэвшүүлсэн олон саналын нэг нь цагаан зээрийг хамгаалахад зориулсан тусгай өдрийг бий болгох санаа байв.Тэгвэл энэ санаачилгыг Сүхбаатар аймгийн Иргэдийн Төлөөлөгчдийн Хурал дэмжиж, жил бүрийн тавдугаар сарын 22-ны өдрийг аймгийн хэмжээнд “Цагаан зээрийн өдөр” болгохоор албан ёсоор зарласан байна.

Онцлон дурдахад, Хэнтий аймаг бас “Цагаан зээрийн өдөр”-тэй болсон билээ. Ийнхүү аймгууд хамгааллын ийм өдөртэй болж байгаа нь бүс нутгийн хэмжээнд зээрийг хамгаалах үйл хэрэг эрчимжиж, цагаан зээрийг хамгаалах уялдаа холбоотой, тогтвортой үйл ажиллагааг хэрэгжүүлэх бодит боломж бүрдэж байна.