Монголын Байгалийн Өв Сан (МБӨС) болон Дэлхийн байгаль хамгаалах сан (WWF)-гийн Монгол дахь хөтөлбөрийн газар нь Монгол Улсын тусгай хамгаалалттай газар нутгийн хамгаалалт, менежментийн үр ашигтай байдлыг сайжруулах чиглэлээр хамтран ажиллах Харилцан ойлголцлын санамж бичигт гарын үсэг зурлаа. Талууд түншлэлийн хүрээнд байгаль хамгааллын ажлын үр нөлөөг нэмэгдүүлэх, байгууллагуудын уялдаа холбоог бэхжүүлэх, мэдлэг туршлага солилцох, хамтарсан санаачлагуудыг хэрэгжүүлэхийг зорьж байгаа юм.

Тус хамтын ажиллагааны санамж бичигт Монголын Байгалийн Өв Сангийн Төлөөлөн Удирдах Зөвлөлийн дарга М.Болдоо болон Дэлхийн байгаль хамгаалах сан (WWF)-гийн Монгол дахь хөтөлбөрийн газрын захирал Д.Батболд нар гарын үсэг зурлаа.

Хамтын ажиллагааны хүрээнд талууд:

-ТХГН-ийн менежментийн төлөвлөлт болон гүйцэтгэлийн арга зүйг сайжруулахад хамтран ажиллах

-Санхүүжилт, техникийн дэмжлэгийг уялдуулах замаар хоёр байгууллагын үйл ажиллагааны үр нөлөөг нэмэгдүүлэх

-Байгаль хамгааллын төсөл, хөтөлбөрүүдийг хамтран боловсруулах, хэрэгжүүлэх

-Хамтарсан мэдлэг, туршлага солилцоо, сургалт зохион байгуулах зэрэг чиглэлээр ажиллахаар боллоо.  

Уг стратегийн хамтын ажиллагаа нь Монгол Улс дахь тусгай хамгаалалттай газар нутгийн менежментийг сайжруулах, биологийн олон янз байдлыг хамгаалахад хувь нэмэр оруулах чухал ач холбогдолтой хэмээн талууд үзэж байна.